Na pusni utorak, 17. veljače 2026. miće i vele maškare naše pusne kumpanije pred školun su po zadnji put pozdravile peto godišnje doba. Vesele maškarice prošećale su svoje modne kreacije i lude frizure, a onda skupa zatancale jednako lipo kako su i na Korzu pred dve šetimane. Se ih je videl i onaj ki je kriv za se – naš pustić Zloćko Zločesti. Z velun jednoglasnun podrškun sih maškaranih i nemaškaranih, maškaronke Erin i Robin pročitale su mu optužnicu, a za koliko je toga bil kriv ovoga i pasanoga leta i ni mu bilo druge nego da na kraju zgori. Finile su maškare, ma mi nećemo fermat – parićat ćemo se i za drugo leto: krepat ma ne molat!
